2021-жылы 21-майда Нарын облусундагы Орхус Борбору Нарын шаарында N4 “Көтөрмө” участкасында ишембилик өткөрдү. Бул иш-чаранын максаты – Нарын районундагы таштандыларды чогултуу, ошондой эле жергиликтүү тургундарды Нарын шаарындагы Орхус Борборунун ишмердүүлүгү менен тааныштыруу. Бул иш-чара С.Нааматов атындагы Нарын мамлекеттик университети менен биргеликте өткөрүлдү. Ишембиликке жергиликтүү тургундар, студенттер, НМУнун жана Агрардык-техникалык колледждин окутуучулары катышты.

Ишембилик башталаар алдында Орхус борборунун Нарын облусу боюнча менеджери С. Калмуратов Нарын шаарындагы борбордун ишмердүүлүгү жана максаттары жөнүндө кыскача айтып берди. Андан кийин агрардык жана техникалык дисциплиналар кафедрасынын окутуучусу А.Жапаров таштандыларды сорттоо жана кайра иштетүү боюнча презентация жасады. Ошондой эле, үй чарбаларында кантип компост жасап, жер семирткич катары багбанчылыкта колдонсо болору жөнүндө айтып берди.

Жергиликтүү тургундар айлана-чөйрөдөгү экологиялык көйгөйлөргө байланыштуу бир катар суроолорду беришти:

1. Таштанды челектеринин абалы жана алардын жайгашуусу. Маселе, бул таштанды идиштери шамалдан корголбогондуктан, таштандыларды шамал бүт аймакка ташыйт. Учурдагы көйгөй жөнүндө “Таза Нарын” уюмуна кабарлап, бул көйгөйдү чечүүгө көмөктөшүүбүздү өтүнүштү.
2. Көпчүлүк жашоочулардын үйүндө тиричилик калдыктарын компосттоо үчүн орун жок. Алар калдыктарды жана кыкты компосттоочу чуңкур казып алышы үчүн, өз аймагына жакын жер сурап жатышат.

Ушул талкуулардан кийин бардык катышуучулар тазалоо күнүнө өтүштү. Тазалоо иштери достук маанайда өттү. 100 кг ашык чогултулган. таштанды. Жергиликтүү тургундар абдан ыраазы болуп, ыраазычылыктарын билдиришти жана келечекте биргелешип иштөөгө даяр экендиктерин билдиришти.